A forza de Galiza

O BNG, A FORZA DE GALIZA

Estamos nun momento decisivo para Galiza, porque o que está en xogo nestas eleccións xerais é moi importante.

En primeiro lugar, a posibilidade de pór solución aos principais problemas sociais e económicos que están a padecer os galegos e galegas: crecente carestía da vida pola desbocada suba dos prezos; salarios e pensións das máis baixas do Estado; problemas para acceder a una vivenda digna como consecuencia da especulación inmobiliaria e a falta de políticas de vivenda pública; viabilidade de sectores produtivos básicos como o agrogandeiro e pesqueiro, entre outras causas polo incremento descontrolado dos prezos dos combustíbeis; dificultades para achar emprego, continuidade da emigración da nosa mocidade...

En segundo lugar, pór freo ao espolio que está a padecer o noso País (enerxía eléctrica, aforro, impostos...) e a proxectos moi lesivos -como os mineiros ou mesmo Altri, que pode vir a ser recuperado- para impulsar un desenvolvemento social e económico sobre a base das inmensas potencialidades que ten Galiza e que contribúa para mellorar a calidade de vida de benestar de todos os galegos e galegas.

En terceiro lugar, avanzar na conquista de dereitos sociais e democráticos, fronte aos intentos de involución promovidos polas forzas políticas que defenden os intereses das elites económicas fronte ao das maiorías sociais, a clase traballadora e o conxunto das clases populares galegas.

En cuarto lugar, combater e lograr superar a histórica discriminación de Galiza en investimentos do Estado en infraestruturas, equipamentos e servizos, especialmente os relacionados coas comunicacións e o transporte público ferroviario.

En quinto lugar, alargar a capacidade de autogoberno do noso País, dotándoo de resortes propios de desenvolvemento e avanzar para o recoñecemento dos dereitos nacionais de Galiza.

Todos estes obxectivos, do punto de vista electoral, resúmense en un: que Galiza teña capacidade para actuar no Estado como suxeito político, de forma libre e non condicionada, e con

capacidade para determinar as decisións que se vaian adoptar en Madrid que afecten o noso País. Sabémolo por experiencia, só o pode garantir a representación do BNG, a única que responde exclusivamente diante do pobo galego e que defende sempre os seus intereses.

A mellor garantía, cumprimos os compromisos

Á hora de votar, para alén de avaliar as propostas electorais e a quen interesan, é preciso tamén valorar o grao de cumprimento dos compromisos estabelecidos por cada forza política no anterior proceso electoral. Especialmente porque para as forzas estatais resulta tan fácil prometer como esquecerse de Galiza en canto pasan as eleccións.

Pola contra, podemos soster con orgullo que o BNG sempre cumpre os compromisos estabelecidos co pobo galego. Tamén o fixo nesta última lexislatura nun contexto especialmente complexo.

Con efecto, os nosos compromisos foron esencialmente tres: a defensa insubornábel dos intereses de Galiza; o impulso a políticas transformadoras, de avance en dereitos sociais e democráticos, que mellorasen a vida das clases populares galegas, e actuar sempre como muro de contención da involución promovida polos partidos da dereita reaccionaria.

E cumprimos.

O BNG conseguiu un acordo de investidura con medidas de grande relevancia para mellorar a vida da xente. Moitas delas, realmente importantes, saíron adiante e están sendo aplicadas. Por citar apenas uns exemplos, conseguimos desbloquear despois de moitos anos de incumprimentos a transferencia a Galiza da AP-9 a través da aprobación dunha lei que traspasa ao goberno da Xunta a titularidade e xestión desta infraestrutura. Logramos tamén bonificacións e descontos nas peaxes da AP-9 e da AP-53 e a modernización e electrificación da vía no tren que une Lugo e Ourense. Así mesmo, conseguimos que o Goberno español incrementase o financiamento da dependencia e que a nova lei recolla sen ambigüidades a obriga de que o Estado financie o 50% do SAAD e que o Estado asumise a condonación de 4.000 millóns de euros da débeda pública galega malia o rexeitamento do goberno do Partido Popular na Xunta de Galiza.

Outros compromisos que estaban en andamento ficaron no ar polo adianto electoral. Porén, algunhas outras medidas acordadas -témolo que dicir con claridade- non foron cumpridas polo goberno do PSOE-Sumar. En todo o caso, é claro que a responsabilidade polos incumprimentos é de quen non cumpre, o que nos leva directamente á reflexión de que máis forza para o BNG e maior representación tamén é necesaria para ter capacidade de obrigar os gobernos españois a cumprir con Galiza.

O BNG foi nestes anos vangarda no Congreso e no Senado na defensa de políticas rupturistas, transformadoras e de avance social. Do impulso ás pensións mínimas e non contributivas por riba do IPC ao aumento dos permisos de maternidade e paternidade; da exixencia de derrogación da Lei da Mordaza ou da reforma laboral do PP de forma íntegra, á defensa da redución da xornada a 35 horas sen mingua salarial; de propostas para atallar a escalada de prezos que afogan as clases populares, ao impulso de medidas valentes e eficaces para garantir o dereito a unha vivenda digna fronte á especulación inmobiliaria...

Vangarda tamén na defensa de políticas de Paz e antiimperialistas fronte á escalada bélica, ao aumento do gasto militar, ás agresións do imperialismo norteamericano, ao xenocidio perpetrado polo sionismo en Palestina ou ao sometemento da UE e do Estado español aos ditados dos EUA e da OTAN.

Aliás, fomos e somos unha voz firme contra as políticas de involución democrática e de recorte de dereitos sociais impulsada polo bloque reaccionario encabezado polo Partido Popular. Comprometémonos a que, se do BNG depender, o PP non chegaría ao goberno e actuamos en consecuencia. Mais tamén confrontamos con firmeza as dereitas ultras, denunciando as súas políticas e a demagoxia que as envolven, mesmo empregando a experiencia práctica de xestión de Núñez Feixoo no Goberno galego durante 13 anos. Hoxe, o compromiso antifascista do BNG mantense íntegro, coa certeza de sermos a forza determinante en Galiza para cortar o paso do bloque reaccionario.

O valor da coherencia

O BNG mantivo sempre a coherencia na defensa dos intereses do pobo traballador galego e de avances en todos os ámbitos. Fixémolo nun contexto especialmente complexo marcado por un Goberno que só cumpría cando era obrigado polas forzas soberanistas e unhas dereitas ultras cun claro programa de involución social e democrática.

As nosas posicións sempre estiveron guiadas polo interese do pobo galego, sempre coas mans libres sen que outras forzas marcasen ou condicionasen a nosa voz e o noso voto. Mantivemos a independencia de criterio, actuando e votando sempre en función de se as medidas políticas en debate eran boas ou non para Galiza e a súa xente. Fomos -e somos- a única forza para a que o pobo galego é quen máis ordena.